28 июня.

Канон преподобным Григорию и Кассиану Авнежским.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их/ в ми́ре упра́ви живо́т наш.

Тропа́рь, гла́с 8:

Правосла́вия наста́вницы,/ благоче́стия и чистоты́ учи́телие,/ Це́ркви Волого́дстей богодарова́нное украше́ние,/ преподо́бнии отцы́ на́ши Григо́рие и Кассиа́не,/ моли́те Ми́лостиваго Бо́га,/ да ва́шим предста́тельством пода́ст благода́ть и мир стране́ на́шей/ и душа́м на́шим спасе́ние.

Кано́н, гла́с 4.

Пе́снь 1.

Ирмос: Пое́м песнь побе́дную Еди́ному Бо́гу,/ сотво́ршему пресла́вная:/ дре́вле бо фарао́на/ со всево́инством в мо́ри погрузи́.

Припев: Преподо́бнии отцы́ Григо́рие и Кассиа́не, моли́те Бо́га о нас.

Посли́ свы́ше благода́ть Ду́ха Твоего́, Христе́ Спа́се,/ и отве́рзи ми устне́,/ я́ко да возмогу́ по достоя́нию воспе́ти просла́вльшия Тя преподо́бныя.

Припев: Преподо́бнии отцы́ Григо́рие и Кассиа́не, моли́те Бо́га о нас.

Просвети́выйся благода́тию Свое́ю, Го́споди,/ просвети́ ми се́рдце и ум,/ да воспою́ Ти, Христе́, хвалу́ в па́мять Григо́рия и Кассиа́на, преподо́бных Твои́х.

Сла́ва Отцу́ и Сы́ну и Свято́му Ду́ху:

Трисия́нным све́том Божества́ просвети́вшеся, преподо́бнии,/ мра́чную тьму грехо́в отгна́сте,/ покая́ния све́тлую зарю́ пода́ти пою́щему вас моли́теся.

И ны́не и при́сно и во ве́ки веко́в. Ами́нь.

Богородичен: Звезда́, я́же от Иа́кова, возсия́ из Тебе́, Чи́стая, я́ко Бог,/ изчита́я мно́жество преподо́бных звезд,/ те́мже Того́ сия́ньми отыми́ мои́х грехо́в тьму.

Пе́снь 3.

Ирмос: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́,/ несть бо свят, па́че Тебе́, Человеколю́бче.

Припев: Преподо́бнии отцы́ Григо́рие и Кассиа́не, моли́те Бо́га о нас.

И́же над все́ми су́щаго Еди́наго Бо́га возлюби́сте вседу́шно, преподо́бнии,/ сего́ ра́ди ви́димая вся, яќо не су́щая, преоби́десте/ и Того́ Еди́наго Христа́ приобрето́сте.

Припев: Преподо́бнии отцы́ Григо́рие и Кассиа́не, моли́те Бо́га о нас.

О земны́х всех, яќо преходя́щих, небрего́сте, отцы́ всему́дрии,/ и сего́ ра́ди Небе́сных благ сподо́бистеся,/ и́же от ве́ка угото́ва Бог лю́бящим Его́.

Сла́ва Отцу́ и Сы́ну и Свято́му Ду́ху:

А́нгельским житие́м на земли́ пожи́вше, Григо́рие и Кассиа́не пресла́внии,/ нестяжа́ние возлюби́сте,/ те́мже Небе́сное бога́тство от Бо́га прия́ли есте́, прему́дрии.

И ны́не и при́сно и во ве́ки веко́в. Ами́нь.

Богородичен: Его́же пло́тию родила́ еси́, всех Бо́га,/ я́ко Сы́на Своего́ моли́,/ разреше́ние зол мои́х да́ти ми от жите́йских обстоя́ний.

Седа́лен, гла́с 8.

Слез ва́ших тече́нием, преподо́бнии,/ погаси́ли есте́ пла́мень страсте́м,/ и источи́ли есте́ ре́ки чудесе́м исцеле́ния,/ и прия́сте от Бо́га Небе́сная наслажде́ния и со А́нгелы вселе́ние./ Тем, соше́дшеся по до́лгу,/ почита́ем всечестну́ю и моле́бную па́мять ва́шу, преблаже́ннии Богоно́снии отцы́ Григо́рие и Кассиа́не,/ моли́те Христа́ Бо́га согреше́нием оставле́ние дарова́ти/ чту́щим любо́вию святу́ю па́мять ва́шу.

Сла́ва, и ны́не, Богородичен:

Я́ко Де́ву и еди́ну в жена́х, Тя, без се́мене ро́ждшую, Бо́га пло́тию/ вси ублажа́ем, ро́ди челове́честии,/ Огнь бо всели́ся в Тя Божества́/ и я́ко Младе́нца дои́ши Зижди́теля и Го́спода,/ тем а́нгельский и челове́ческий род досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Пе́снь 4.

Ирмос: Неизсле́дный Бо́жий Сове́т,/ е́же от Де́вы воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.

Припев: Преподо́бнии отцы́ Григо́рие и Кассиа́не, моли́те Бо́га о нас.

Сокро́вище нетле́нное цельба́м днесь нам от Бо́га дарова́ся/ явле́нием честны́х моще́й ва́ших,/ Григо́рие и Кассиа́не преподо́бнии.

Припев: Преподо́бнии отцы́ Григо́рие и Кассиа́не, моли́те Бо́га о нас.

Авраа́му поревнова́сте пра́отцу, преподо́бнии,/ вся своя́ оста́вльше и в пусты́ню всели́стеся,/ я́коже он в зе́млю обетова́ния.

Сла́ва Отцу́ и Сы́ну и Свято́му Ду́ху:

Фарисе́йское киче́ние возненави́девше, преподо́бнии,/ и мытаре́ву смире́нию ревну́юще,/ те́мже и Госпо́дь сла́вою превознесе́ вас.

И ны́не и при́сно и во ве́ки веко́в. Ами́нь.

Богородичен: Оскверне́ннаго мя ка́лом греха́/ моли́тв Твои́х окропи́ иссо́пом/ и омы́й скве́рну страсте́й мои́х, Влады́чице,/ и я́ви Ду́ху Свято́му жили́ще.

Пе́снь 5

Ирмос: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия Сла́вы сия́ние Божества́,/ от но́щи у́тренююще,/ воспева́ем Тя, Человеколю́бче.

Припев: Преподо́бнии отцы́ Григо́рие и Кассиа́не, моли́те Бо́га о нас.

Ка́менем ве́ры утверди́вшеся, святи́и,/ вра́жеских ветр не убоя́стеся/ и припре́ния мы́сленных рек к душе́вней ва́шей хра́мине.

Припев: Преподо́бнии отцы́ Григо́рие и Кассиа́не, моли́те Бо́га о нас.

Сказа́ти кто возмо́жет бы́вшая ва́ша чудеса́, преподо́бнии,/ слепы́я бо просвеща́ете, исцеля́ете неду́жныя,/ к вам притека́ющия.

Сла́ва Отцу́ и Сы́ну и Свято́му Ду́ху:

У́глия стра́стная ту́чею слез свои́х погаси́сте, преподо́бнии,/ пло́ти моея́ мы́сленная распале́ния, молю́ся, погаси́те/ моли́твами свои́ми, пресла́внии.

И ны́не и при́сно и во ве́ки веко́в. Ами́нь.

Богородичен: Рай жи́зни, Богоро́дице, су́щий,/ сме́рти грехо́вныя и страсте́й многообра́зных/ изба́ви мя, раба́ Твоего́, вско́ре.

Пе́снь 6.

Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли избави́ мя, Иису́се, Царю́ сил.

Припев: Преподо́бнии отцы́ Григо́рие и Кассиа́не, моли́те Бо́га о нас.

Ду́ха Свята́го помава́нием, преподо́бнии,/ ле́гце преидо́сте мо́ре жития́ сего́,/ волна́ми вра́жиими не влада́еми,/ соблюдо́сте теле́сныя ва́ши корабли́.

Припев: Преподо́бнии отцы́ Григо́рие и Кассиа́не, моли́те Бо́га о нас.

Еги́пта страсте́й избего́сте, прему́дрии,/ и мо́ре мы́сленное жития́ многомяте́жнаго преидо́сте,/ и в зе́млю ра́йскаго обетова́ния, ра́дующеся, всели́стеся.

Сла́ва Отцу́ и Сы́ну и Свято́му Ду́ху:

Сла́вящая Мя просла́влю Са́м,– рече́ Госпо́дь,/ те́мже и просла́ви вас,/ е́же твори́ти на земли́ зна́мения и чудеса́ пресла́вная.

И ны́не и при́сно и во ве́ки веко́в. Ами́нь.

Богородичен: Це́рковь Тя Бо́жию и пала́ту душе́вную преподо́бных лик разуме́в,/ мо́лит Тя, Еди́ну, отъи́мшую на́ше поноше́ние.

Конда́к, гла́с 4.

И́же плотска́я мудрова́ния Ду́хови повину́вше/ и вся, я́же на земли́, презре́вше,/ Христу́, Еди́ному Бо́гу, прилепи́вшеся, святи́и,/ и Того́ ра́ди в пусты́ню всели́шася,/ источа́ете ны́не исцеле́ния/ с ве́рою притека́ющим к моще́м ва́шим,/ поле́зная нам проси́те от Бо́га/ моли́твами ва́шими богоприя́тными,/ Григо́рие и Кассиа́не преподо́бнии.

И́кос:

Свяще́нная и Богому́драя дво́ице оте́ц пречу́дная,/ на земли́ до́бре подви́гшеся,/ целому́дренно и пра́ведно пожи́вшая,/ по́стнически испыта́вшеся, любо́вию и наде́ждею вооружи́вшеся и ве́рою огради́вшеся,/ разори́ша хи́трости вра́жия кова́рствия/ и, с ли́ки святы́х всех Царя́ Христа́ Престо́лу предстоя́ще,/ Его́же све́том просвеща́еми, подо́бными венцы́ венча́стеся,/ во всем ми́ре чуде́сными заря́ми блиста́юще,/ поле́зная нам проси́те от Бо́га моли́твами ва́шими богоприя́тными,/ Григо́рие и Кассиа́не преподо́бнии.

Пе́снь 7.

Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Припев: Преподо́бнии отцы́ Григо́рие и Кассиа́не, моли́те Бо́га о нас.

Сокро́вище бы́ша мне́вшему,/ свеща́ горя́щая яви́стеся, преподо́бнии,/ те́мже отемне́нное грехи́ се́рдце мое́/ све́том моли́тв ва́ших, святи́и, просвети́те,/ да пою́ всегда́:/ препе́тый отце́м Бог, благослове́н еси́.

Припев: Преподо́бнии отцы́ Григо́рие и Кассиа́не, моли́те Бо́га о нас.

Разреши́, Григо́рие преподо́бне, моли́твами свои́ми/ ду́шу мою́, свя́занную прило́ги льсти́ваго,/ я́коже разреши́л еси́ свя́заннаго, я́ко да благода́рственно пою́:/ препе́тый отце́м Бог, благослове́н еси́.

Сла́ва Отцу́ и Сы́ну и Свято́му Ду́ху:

Сокро́вища тле́юща иска́вша иногда́/ отри́нусте, от гро́ба ва́шего, святи́и, разсла́бивше,/ и па́ки пока́явшуся здра́вия сокро́вища нетле́ния пода́сте, пою́щу:/ отце́м Бог, благослове́н еси́.

И ны́не и при́сно и во ве́ки веко́в. Ами́нь.

Богородичен: Раздери́, Де́во Чи́стая, Твоего́ Сы́на ору́жием/ мои́х грехо́в рукописа́ние и спаси́ мя, пою́ща:/ препе́тый оте́ц на́ших Бо́же, благослове́н еси́.

Пе́снь 8.

Ирмос: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Припев: Преподо́бнии отцы́ Григо́рие и Кассиа́не, моли́те Бо́га о нас.

Разсла́бленнаго иногда́, моля́щася, святи́и, возста́висте/ и сего́ быстре́е ходи́ти напра́висте./ И мене́, ослабе́вша благи́ми дея́нии, моля́щася,/ укрепи́те ко благодея́нием, да взыва́ю:/ благослови́те, вся дела́ Госпо́дня, Го́спода.

Припев: Преподо́бнии отцы́ Григо́рие и Кассиа́не, моли́те Бо́га о нас.

Ослепле́ны зени́цы души́ моея́/ просвети́те све́том моли́тв ва́ших, преподо́бнии,/ и́же слепы́х просвети́сте дре́вле,/ с ни́миже да пою́ всегда́:/ благослови́те, вся дела́ Госпо́дня, Го́спода.

Припев: Преподо́бнии отцы́ Григо́рие и Кассиа́не, моли́те Бо́га о нас.

Отрокови́цу, ю́же на земли́ пове́ржену, боле́знующу,/ иногда́ явле́нием ва́шим, святи́и, возста́висте и здра́вие соверше́нно пода́сте,/ не к тому́ такова́я бы́ти, ей реко́сте.

Сла́ва Отцу́ и Сы́ну и Свято́му Ду́ху:

Согни́вша и воземерде́вша, ра́ны души́ моея́ неисце́льныя/ моли́твами ва́шими, святи́и, исцели́те,/ я́коже согни́вша и смердя́ща иногда́ здра́ва показа́сте, да пою́:/ благослови́те, вся дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Изба́влься кля́твы пе́рвыя Тобо́ю,/ Пречи́стая Богома́ти Благослове́нная, Влады́чице Благода́тная,/ тем ве́рою пою́:/ благослови́те, вся дела́ Госпо́дня, Го́спода.

Песнь 9

Ирмос: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́./ Тем Тя вси велича́ем.

Припев: Преподо́бнии отцы́ Григо́рие и Кассиа́не, моли́те Бо́га о нас.

Певце́м, и́же пою́щим вас и честно́е обре́тение ва́ше торжеству́ющим,/ моли́твами ва́шими от враг мы́сленных и ви́димых/ изба́вится моли́теся, преподо́бнии.

Припев: Преподо́бнии отцы́ Григо́рие и Кассиа́не, моли́те Бо́га о нас.

Я́ко крин, в по́стнических удо́лиих процвето́сте, Григо́рие и Кассиа́не,/ днесь пра́ведным удобре́ние показа́стеся,/ благода́тию Ду́ха сия́юще и озаря́юще ве́рно пою́щих свяще́нное ва́ше торжество́.

Сла́ва Отцу́ и Сы́ну и Свято́му Ду́ху:

Си́лою Бо́жиею укрепля́еми,/ неви́димаго врага́ шата́ния не́мощна показа́сте/ и в чудесе́х сла́вни от Бога́ яви́стеся,/ те́мже ва́ше почита́ем обре́тение.

И ны́не и при́сно и во ве́ки веко́в. Ами́нь.

Богородичен: Спаси́, Богоро́дице, и́же к Тебе́ прибега́ющих/ от бед, и паде́жа греха́, и бу́ри теле́сных страсте́й,/ и волне́ний ну́ждных печа́ли и жития́, и зло́бы лука́вствия.

Свети́лен:

Я́ко два свети́ла, возсия́сте в пусты́ни,/ зе́млю Ру́сскую просвеща́ете заря́ми чуде́с, преподо́бнии,/ во тьме грехо́вней су́щия ны озари́те све́том/ И́же в вас Су́щаго Бо́жия Ду́ха.

Сла́ва, и ны́не, Богоро́дичен:

И́же от Бо́га ми́рови по́данным благи́м Ты вина́ бысть, Богоро́дице,/ ны́не ми́лостива сотвори́ о о́бщем спасе́нии на́шем благопреме́ннаго Бо́га.

Молитва

К вам, о святи́и преподо́бнии отцы́ Григо́рие и Кассиа́не, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.